افسانہ

پروفیسرغمخوارحیات
فروری نا یخو دے ئس اس …. شال ئٹ سہب ئناپرداسکاسرشام اسکا برجا ءاس….شال نا ہرگلی کوچہ دریاب نا مثل ئس….
لوکل بس سول ہسپتال نا گورآن وختس سائنس کالج ئُُ پرنس روڈ نا چوک ئَ رسینگا توداڑے پرنس روڈآ بروکا نالی تادیر اندن ترند ئس کہ پیادہ بروکا مخلوق ئِ چرینگ نا گیگ ہم الّو….
لوکل نا کلینڈر کوک کننگ اس …. سریاب ….سریاب ….آخری گاڑی ….
سریاب …. مل ….کسٹم …. مارکیٹ …. ہزارگنجی ….سریاب….سریاب
چوک آ سلوک آ مخلوق مشکل ئَ سیٹی تینے لوکل ئَ سر کرے ….
داسواری تون اوارماما نوردین ہم لگّا…. ماما سوار مننگ تون رَٹ کُٹ ئِ شروع کرے ….
یار آخہ جوفہ کیرئِ ….اسُل مسلمانی اف نمے….لوکل پُرئِ اراڑے خدیت امبار ٹنگّن تینے ….؟ ایکان دا بھلا بڈ….
لوکل ٹی جتاوڑنا تب نا بندغاک تولوک اسُردُنکہ اسہ سیٹ ئَ سے اسہ بندغ ئس تولوک پانادہ تینا بیلچہ ئس توریسس گمان کہ دا مزدور ئس اس اوڑتون ہم زان ئَ دستاری اوغانس خننگاکہ ،دانگ جک سلوک کماش سینا پچاتیا رہر رنگ نا داغ ئس شاہد دا رنگ روغن کروک کاریگر ئس اس….
پر برجا ءاس….درختاتا بارونا لٹئَ تیان پِرنا پڑیک اندن وہنگ اسُر دُنکہ مچی ٹی تہل تموکو کودک ئَ سینا خڑینکاک ….
لوکل ڈبل روڈ آ چیلنجر اکیڈمی نا اسٹاپ ئَ رسینگا توخوانندہ ورناتا اسہ گچ ئس لوکل ئَ چانک تس سوار مس ….انداخوانندہ غاتون …. مدثرہم سوار مس….
لوکل ٹی نت تخنگ نا جاگا الو….اسٹ ئس مامانوردین نا نت ئِ لغت تس تو اونا چپی ولدا پنّا….یار دا ہم انسانیت ئَ سے….منشی ماما ئِ تسلی تننگ کن …. ماما نن ہم مجبور اُن ….خنسہ پرئُُ برسات یخ ئٹ سُہب آن تاشام اگ وگ اُن ….وﷲمستی آن منشی گری کپنہ….گڑاس نرینہ سواری مونا ڈرائیورنا گوارا توسُرکہ نیاڑی سواراسُل الوس….
اسہ سیٹ ا سے آ تولوک اِرا بند غ تینتو گپ کرسہ سرکارناکڑدآن غاو کننگ اسُر…. اسٹ تا پارے اینو فلادفتر ئَ اناٹ تینا پنشن نا کیس ئِ جوڑ کننگ کن …. وابھائی وا بھائی عجبو تماشہ مریک دفتر تیٹ …. بغیر رشوت آن اسہ گپ ئس ہم مفک …. باورکیس دافائل ئِ جوڑ کننگ کن پانزدہ ہزار رشوت تسونٹ….اوفائل دوتخسہ پارے …. قسم خدانا ای پین ہچو دونو ملک مفرو داخہ ظلم داخہ ناانصافی ….یار عمر مچ ملک نا خذمت ئِ کرین …. داسا ننا جند نا جونیر سنگتاک ننے آن رشوت خوارہ گڑا کاریم کیرہ ….
خواجہ دیرآن غاﺅ کیسا صدر آن الیس چپڑاسی اسکان کل دُز ئُُ داڑیلو ….ارٹمی بند غ اودئِ مچٹ پین پوہ کرے ….
کاکا مچ ئٹ مونا …. ایلم نم تینے اگہ زرس تکلیف کیرئِ ….بشخس چنکا ایلم ….اینو پر نا خوشی ٹی ڈبل ئِ ….
ماما نی غصہ کپہ مریک کائک ….مزل خڑک ئِ ….ننتو اڑدے انداوڑکو….منشی تینا انداز ئٹ گپ کننگ ئس….
اسہ روٹ ئَ شست آن زیات گاڈی ئُُ ….داسا نی تینٹ انصاف کر …. نا مونا ہشت اسٹوڈنٹ لگار دانیماکرایہ ایترہ ….آ….امر تینا ایلمکو …. ارفپن تا وا….وا،وا توڑ تا شروع مریک …. ٹئراُشنگ …. روڈئِ بندکننگ …. خل خسنگ ….
ماما بڈنا تینا خیال ئِ کیس ….ورنا ئس ماما نوردین ئِ ہوشار کرسہ پارے …. اھو چنا …. دا سوٹ کیس ئَ سے …. مسڑھ نا کنا برام مریک اِرا دے آن پد …. غریبی ئِ رکشہ ہم کننگ کتوٹ….
آسمان داسکان خڑینک خلینگ اس…. نالیک دریائے مولہ نا وڑ برونگ اسُر….ایکہ گوریچ سوتڑیکہ….
لوکل ٹی عبیداﷲ نا باگل ئَ سینا توار اس….
داسفر ہم یادگارے
شارمُر ئِ نن تہارے
سریاب ….سریاب…. مل ….کسٹم …. مارکیٹ …. ہزارگنجی ….سریاب….سریاب….آخری بس ئِ….
کلینڈر ناکوکاک ….پرتو اواراسُر
یار داننا سریاب نا ورناک ….زیات تر منشی گری کیرئِ نم خوانپیرئِ انتئے ….خوانندہ ورنائس تینا وڑئٹ منشی ئِ پنت تس ….انت پان ایلم ….؟سوارئِ پیادہ نا انت معلوم ….؟نے امو احمد شا ہ بلبل والا مثال ئِ تروئی تمک …. انت مطلب ؟ امو خوانندہ گڑینکسا منشی ئِ سوج کرے ….
ایلم احمد شاہ بلبل نا دُن تو مثالاک باز دُنکہ او پائک اگہ فٹبال ئِ اندن شاٹ ئس خلیس توداگول تیان اے گول تسکا جوانی ئٹ کائک ولے اندا فٹبال ئِ اگہ کریٹ ٹی کیس کریٹ تواوار شاٹ کیس گڑا …. گڑا متو نا….بس ننے اندن سمجھ نن امو فٹبال مسن کہ داساکریٹ ٹی اُن …. اخہ شاٹ خلیس نن انپنہ ….
غریبی خواننگ کن الک …. اینو حالیت ئَ تے خنسہ ….
ھو سہی پاسہ ننے جوان سمائے کہ اینو دا کبینی نادور ٹی خواننگ امرے….مدثر منشی تواتفاق کرسہ پاننگ اس کہ ای تو دالبندین نا خلق داود آباد آن داڑئِ خواننگ کن بسونٹ داکا ایکا چندہ کیوہ خوانیوہ ….ای کامر س کالج ٹی خواننگ اُٹ ….ننا کالج ئِ تینا ہاسٹل اف …. منہ دے لائیواسٹاک نا ہاسٹل ٹی رہنگان داسااوکن ہم کشار ننے ….وﷲ سخت پریشانن …. اینگن ملکی حالتاک اندنو کہ ہچ گارنٹی اف ….خداکپ تا اندا سسٹم تون …. پین جاگہ کس اگہ کس ارغ ئس خنپ ولے محفوظ توارے….مدثر تینا اُست نا لار ئِ کشّا….
لوکل متکنااڈّا نا چورنگی آ رسینگا ….اسہ ورنا ﺅ مارس پرِئٹ سلوک چڑاسُس….اونا نت منڈاس کہ دوٹی تا معذورا تالٹ (بیساکی) ئس اس….برسوار مہ…. کرایہ دیچاارے اف نیتو …. بر اﷲ اَراٹی راضی ئِ ….منڈانگاورنا منشی نا کمک ئٹ مشکل ئسے ٹی سوار مس….
بس پنچ گام اناسس…. کہ اندا بس ئٹ بھلو دریمبہ اس مس ….
ساھت ا سے ٹی بس زراب الک ….