کوئٹہ سمیت بلوچستان کے مختلف علاقوں میں بارش اور پہاڑیوں پر برفباری کا سلسلہ جاری

کوئٹہ سمیت شمالی بلوچستان کے بیشتر علاقوں میں رات کو ہونے والی موسلادھار بارش سے جل تھل کا سماں پیدا ہوگیا ۔ پہاڑوں پر برفباری سے درجہ حرارت منفی ایک سینٹی گریڈ تک گر گیا ۔کوئٹہ اور گردونواح میں بادل کھل کر برسے ۔ بارش اور پہاڑوں پر برفباری کے بعد شہر میں ٹھنڈی ہوائیں چلنے لگیں جس سے سردی کی شدت میں اضافہ ہوگیا ۔بارش سے درخت ، پھول ، پتے اور پودے دھل گئے ۔ شہری خوبصورت موسم سے لطف اندوز ہونے کے لیے گھروں سے نکل آئے ۔بارش اور برفباری کے بعد شہر میں درجہ حرارت نقطہ انجماد سے نیچے گر گیا ۔ موسم کا حال جاننے والے کہتے ہیں آئندہ چوبیس گھنٹے میں شمالی بلوچستان کے بیشتر علاقوں میں مزید بارش اور پہاڑوں پر برفباری کا امکان ہے ۔