اسہ دا ہم غم اس ارے

Book with pen, EPS file version 10.Contains transparent objects (shadows)

رحیم زام
نوشکی ٹی کس شاعر مَس تو چندی بندغ آک کُل آن مُست اندا سوج ٹی پارہ تینا سے یا بیگانہ سے ….؟اول پاریرہ کہ شاعر مننگ کِن عشق لازم ئِ ولے دا زمان نن کن براہوئی ادب غمِ جانان آن ہم زیات ئِ اگہ کس ئِ یقین بفک تو اسہ شاعر اسینا شعر اس عرضئِ
مفعول مفاعیل مفاعیل فعولُن
بس دادِ رُباعی ناوزن بازِ توایہُن
اسُل کاٹم تمتوکہ شاعر داٹی تو براہوئی ادب نا ہچ ئُُ گپ اس کتہ نے….اندن داٹی کس غور کے تو تیناصنم نا ہم گپ ئِ کتہ نے ….ہیت غم ِجانان آن زیات براہوئی ادب نائِ اوتوظاہر مننگ ئِ انتے کن اوتینا شاعری نا دابنداٹ تینا صنم تینا مہر ناگپ ہم کننگ کریکہ ولے او صنمئِ رباعی نا بحر کِن ندر کرے….
تو کناگپ راست مس متوکہ براہوئی ادب نن کِن غم جانان آن زیات ئِ۔اگہ پورا شاعری ئِ نظر شارے تو پین پین انت ندر کرینے صاحب علم آک چارہ ۔
ہیت ہیت آن پیشن مریک ….اندا شاعری نا رنج آن سنگت ا سیتون ارمان کرسا پاریٹ براہوئی ادب اٹ شاعر ک باز بلولتاڑ اس شاغانواینوپگہ ….توکنے ہم اسہ خرین ئُُ ورندی اس ایلو کُنڈ آن رسینگا۔
او بیوس کس پائے نی پین شارا سیٹی اُس براہوئی ادب اٹ ایلو جاگہ ناشاعرک لتاڑ شاغانو یانہ ولے دا گپ اسُل پک ئِ کہ نوشکے ناشاعر ک باز بلو لتاڑ اس بَش کرینو اگہ داسانا مردم شماری ٹی شاعر تے جتا شمار کیر تو نوشکی ٹی اوفتا اسہ جوانوپینل اس جوڑ مریک ۔
ای ہم سوختہ مرسا پاریٹ تا….ولے افسوس کہ شاعرتیٹ کَس کٹپروئے بلا گڑا سیوت ئِ ہرا ننے آن بِیش نا مرغ امبار باز مُر ئِ۔او پین ہیت ئس اس دا سنگت ناہیت اٹ وزن اس۔قدرتی ای اسہ دے اس زراعت نا دفتر ٹی اسہ میٹنگ اسیٹ ساڑی اسُٹ اسہ پیشن نا افسر ئس ہمے مف کہ پراد کے اونا ہیت دا اس کہ نوشکے ئِ انت مسونے ہر سال پیماز نا پیداوار زیات مننگ ئِ نن اخس پانہ غلہ دَسبو ولے پیماز پین زیات مرسہ ئِ۔توشاعرتا ہم اندا حال ئِ ہر سال پین ودنگ ئُُ بیرہ نوشکی ناکوئٹہ ئُُ مستونگ نا ہم فصل پیماز مرسہ ئِ اندن لگک
اگہ شاعر زیات مرے ہم تو داٹی ہچو عیب اس مفروئے انتے کن براہوئی ادب نا رسم زمانہ اندادے کہ ادب اٹ بننگ کِن علم ہنر نہ بلکہ اول شاعرمر دوارہ چار پنچ سال ٹی ہیل کیس کپیس پِن اس جوانو ہلیسہ۔داسا ئنا اشتاف آ دورا ٹی سال آ سال تا ہم انتظاری اف بلکہ ”شاعری برائے فروخت“ نا ترانہ اس تمانے ہرا نا سوب آن کنے اسہ گلوکار اس پارے شعر ئِ نا پاوہ ولے اسیکہ دا پاہ کے” کُللک“اس ارے اف نے؟ مطلب کہ پیسہ اس۔ ای ہم اوڑان اُست ایکیم کریٹ۔
فِیس بُک نا میخانہ ہمو میخانہ ئِ ہراٹی جوان مرے خراب مرے اسہ جاگہ دا فیس بُک آن چندیک پنی مرسا ئُُ….ہراکہ ای شعر ئِ اول اٹ نوشتہ کرینُٹ او شاعری ہم فیس بُک نا پیدا وار سے۔دا کُل آتازموار ننا بلاشاعر ادیب آکو ہرافک تینا نوشت ٹی شاعر تے گمراہ کرینو۔دُن کہ غمخوار حیات ناشاعری سے باز پنیئُُ :
نن گنوکاتے گنوکس پوہ مریک
اندا شاعری نا سوب آن اگہ کس ئِ پاریس دا انت لکھانس تو اول گپ تا اندا مریک ”نن گنوکاتے گنوکس پوہ مریک“ داکان پد ہیت خلاس مس۔
داڑآن بیدس اسہ سنگت اس تینا شاعری اس کنے شان تِس ہراٹی او تینا صنم تون مخاطب مرسا ہیت سیٹ تینے ”گدھا“ لکھاسُس۔
ای سوج کریٹ دانا معنہ انت ئِ ….؟
تو او پارے ….کنے انت خبر دا شہزادنذیر نا شاعری سیٹ اَس تو ہلکُٹ تا۔مطلب کہ گدا ئُُ گدھا نا فرق ئِ کس تپ گڑا خدا خیر کہ۔ براہوئی ادب نادڑد آک تو ایہن چٹ باز ئُُ ولے دڑد آتا کاٹم پاس یا ملی ….براہوئی نااملاہم بے مُراد ئِ ننے آن ….ای ہر وخت تینا افسانہ آتے دانگ اینگ مون ایتیوہ ادب دوست آتیکن اندن اسہ افسانہ اَس دا زوت آتیٹ ”میرات“نا پِن اٹ تلار ٹی شینک مس ہرانا اسَل پن ئِ ای میراث کریسُٹ ہرادے تلار نا ایڈیٹر بدل کرے۔اندن دا افسانہ ٹی منہ پین لوز ہم اسُر ارا بدل نا لائخ اسُر۔افسانہ خواننگ تون اسہ سنگت اس پارے براہوئی ادب اٹ بیرہ پنڈنگ شروع ئِ تینا لوذا تے اسُل مونی اتپسہ نی اِشکامی لوز ئِ ایسُن اُس دا براہوئی نا سے یا پین زبان اسینا اگہ براہوئی نا سے تو داپاہ کے بُنماسی لوزا سے یا پد نا بروک اسے۔
اول ای بُنماسی نازی آ سرگڑدان مسُٹ انتے کِن دا لوز ئِ ای تینٹ اولی وار بنگسُٹ۔اندن کنا او دا سنگت نا تران باز بلُن مس کنا ہیت آتیان زیات او کنا املا ئے خن آن کشنگ اس پارے نی لوظ لکھسااُس دالوز مریک۔اندن پارے نے براہوئی نا اسکان کِن املا نا خبر اف اف گڑانی امر افسانہ لکھسااُس انداوڑ نا ادیب آک براہوئی زبان کاٹم ئِ مشان اُرے۔ نوشکی ناک فارسی و بلوچی نا لوز تے اوار کرین اُرے اندن اسہ کُنڈ آن سندھی تو اندن چندی زبان تے براہوئی گڈّو کرینے یا بس لوز پنڈنگ نارواج ئِ۔انداڑ تون براہوئی لکھ وڑ نا حروف اتے مون تِس۔(ا،آ،ب،پ،ت،ٹ،ج،چ،خ،د،ڈ،ر،ز،ڑ،ژ،س،ش،ع،ف،ک،گ،ل،ل،م،ن،و،ہ ھ،ی،ے)
کنا اُست ترخا پاریٹ گڑا ای حلوہ لکھنگ کپرہ….!!!!
ننے ضمیر ہم اف….!!!
صدقہ کننگ کپرہ ہچس….!!!
ای تینا حیرانیئِ اخس زیات کریٹ ولے او ہمو ڈاکٹر تا وڑ ہرا فلم تیٹ آپریشن روم آن پیشن مرسا اندن بے غم بے غم ہیت کیرہ کس پائے بندغ نا کہنگ ہچو گپ اس اف داسنگت ہمو ڈول پارے…. حلوہ مگہ نا ئِ….؟؟؟
ای ہم پاریٹ ….اگہ کنا کردار ئس حلوہ کنسہ مَس گڑا ای حلوہ لکھپرنن تو ن تو(ح) حرف افک….؟اندن داڑے تو(حرف) ہم (ح) نا محتاج ئے ….محتاج ہم (ح) آن بیدس پورہ اف دا ساامر مریک….راست پاس تو کنے داخس (ح) کِن ہلتوس اُس حلواہ کِن ہلکوسُس۔
او اسکان کِن ڈاکٹر طب ٹی اس پارے….رحیم جان ای نے مالہو پاریٹ ہرا لوز ہرازبان ناسے اودے ہمو زبان نا وڑ لکھ ….ولے ہرا لوز کِن نن تو براہوئی زبان ٹی لوزارے تو پین لوز نا کاریم اف۔حلوہ عربی نا سے ہرااِرا وڑٹی بریک ہنینی کِن زیبائی کِن دا ملتان نا میرات اف کہ نی اُست ہشنگ اُس حرف ہم ننا اف ۔
ای پاریٹ نن ہلہ خدا پانا ….خدا ہم فارسی نا لوز سے گڑا نن تون خدا کِن ہم لوز اس اف ….؟
نی اللہ لکھ خُدا لکھپہ ….
کنے اندن ترند ترند او ورندی ملینگ اس کہ ای ہم سوچاٹ کہ ہیتئِ کٹفیو انداڑے زبر مروئے
پاریٹ سہی گڑا ….خدا ئِ بدل کپر حلواہ ہم سہی ضمیر سلامت مس صدقہ ہم مریک مطلب کہ ای کُل ئِ نوشتہ کننگ کیوہ پنڈہ اس افک گڑا جیڑہ ختم ننا ۔
خدا حافظ
ورندی دُن بس….خدا :فارسی۔حافظ :عربی…. اللہ کمک پا جوانے۔
اندا حرف آتے پین ادب خواجہ سیکن مون تسُٹ تو ورندی بس کہ داغلط ئِ۔ای سوچاٹ اے تو بازگپ کرے ولے دا اسہ دم تون پارے داغلط ئِ۔
ای پاریٹ….اوامر….؟
ورندی بس….داحرف آک ننا افس بیرہ (ل٭)ننائے نن گدانی تے وا ہراکہ لوز واملا مَس۔دالوذ نا ہم کسہ دُن مروئے ….چنا پارے باوہ دا انت سے باوہ پارے میل٭….باوہ بیڑا تے چنا پارے ہلہ دا انت ….باوہ پارے پال٭ ۔چنامیل ٭تے ہرفے مَش مون ئِ ہنا ایڑے خنا جوجک ئس ہرامیل٭ئِ ڈنگ اس خلک چنا پراد کرے باوہ پارے انت مَس او ہم پارے ….باوہ تیل ٭….چنا نا اُست شولنگاسُس جون تاباسُن اس لمہ تا باوہ ئِ تا سوج کرے انت مَس چنائے ….باوہ پارے ہچ متوتہ بَس دا ناروہ آ ہیل٭ئِ۔
دا کسہ بیرہ کنا تفوک اسے دا گڑا تاپنک ہمو ننا گڑاس شاعرتا قافیہ نا وڑ ئُُ ہرا بیرہ آخر تے اسہ وڑ کیرہ۔
خیر حاجی صاحب پارے اسکان کِن براہوئی ادب اٹ ٹکی بسنگ نا رواج ئِ اِرغ نا وخت بس گڑا خبر تمک ۔

Related Articles

Leave a Reply

Your email address will not be published. Required fields are marked *

Close
Close