میرات

عبدالرحیم زام
ہل ہل ٹی تدفین ہم مس۔
ای توتینا شار ….تینا اُرا آن باز مُر اسُٹ۔باوہ نامرک نا بنگُٹ تو تینے زو اَس اُرا ئِ سرکننگ نا سوچاٹ۔
ولے ای اخس اشکامی کریٹ ئُُ کُل پوک مسُر۔انتے کہ مرک آن پد بلا دود اندا مریک کہ اونا تیناک اودے زو اس مِش تا گواچی کیر۔
کنا ایلم ہم زند تنا دا دود تون تفےسُر….و ہل ہل ٹی باوہ ناتدفین ہم مس۔
مسہ دے ماتم نا رنگ آک در ئُُ دیوار ئِ تالان اسُر۔شرعیت نا پاسداری ہم مس او کونٹ ئِ مُچ کننگ آ۔
ای تینا اُرا گودی تون زرس باوہ نا مرک نا سوب نا ذی آ تران ٹی لگاسُٹ کہ بلا ایلم نا کلہو بس کہ بمائے چناتون تینے ننا اُراغا رسیف۔
ایڑے کہ ای ہناٹ تو خن نا خنوک آک دا وڑ اسُر کہ کل ایلمک مطلب ہر چارہ ایلمک بمائے نشار تے تون اوار ساڑی اسُر ایلم سراج کنے بخیر کرسا پارے ….
جوان مس کہ بسُس نے آن بیدس دا شرعیت نشست بے زیب اسکہ۔
کنا اُست تو مخنگ خواسکہ کہ شرعیت نا نشست اٹ زیب نا گام باز بے بے و گپ ئس اسک ولے ای اسہ نزور و بشخندہ سے ٹی گزارہ کریٹ۔
کنا تولنگ تون بلا ایلم پارے کہ ….دُن کہ کُل ئِ خبر ئِ باوہ نا مرک آن پد اونا میراثئِ بشخ و بانٹ کروئی مریک دا ننا شرعیت ہم پائک ۔
اندا گپ نا ایسری آکُل ایلمک پاریر راست پاسہ دا تو حقیقت ئِ بشخ بانٹ شروع مس ۔
دادُکان تا حصہ داری مس….دا اُرا نا بشخ بانٹ مس ….اے پالیز والا ڈغار نا ہم بشخ بانٹ مس۔
دُن تو ہلو کہ بشخ بانٹ جی ھو ،جی ٹیک ،او سہی ٹی مس بلکہ اسٹ ایلو آ جلہو ہم مس ،بَش تول ئس مس،ہیت آتا چغلی تیٹی اسٹ ایلو ئِ ٹپی کننگ نا ہم کوشست آک مسُر۔
ای چُنکا اسُٹ تو بیرہ اندا پاننگ کریٹ آکہ ….آن اندن مرے جوان ئِ ….آن وارس کنا فقرہ بدل ہم مسکہ موقع نا خواست اٹی۔شُکر ئِ نشارک ہم تنا ہمسفرِ زندا تو کمک کریر۔ کنے ہم منہ رُنڈک لگااُرا نا گودی نا کُنڈ آن ولے ای تینے بے چکار کریٹ انتے کہ کنے تینا سگ نا خبر اس کہ ای ہیت کریٹ تو کنے ہمے شغان و ہیت آتا چغلیک لگور کہ دوارہ کنے ہم خبر اف کے کنا انت حال مروئے۔
آخری بشخ بانٹ اٹ باوہ نا ہمو گڑاک بچار ہراک اونا زندنا ہڑدے ہی کاریم بروک آ ک اسُر….ہراتیٹ اونا چڑی ہرادے بلا ایلم خوندی کرے اوہم نشار ناباٹی کہ اونا باوہ کِن۔اندن جاہ نماز او تسبیح آ ہیت مرسہ اَس کہ ایڑ ناز جان سُبحان اللہ نا تران تون پارے کہ ہمہ جوانو تسبیح سے داوڑ دا اونا مَس بمائے جاہ نماز تون۔
داسا ہیت سلیس باوہ نا کوٹی آ کے دادِنا مرے ….ہرکس تینا کُنڈ آن جواز ترسہ اس کہ دا دا سوب آن کنا مرے تو جوان ئِ ۔
ای اوفتا دا گپ آ تیان بے پروا ایلم سراج نا مار ئُُ ایلم دین جان نا مسڑ ئِ ہُرسا اسُٹ ہراکہ ایڑ ناز جان نا دو آن تسبیح ہلکسُر اونا ذی آ بلو چکی تاڑی اس اسک ….دا چکی تاڑی اٹ تسبیح نا دانہ غاک ہم ڈغارئِ اندن تالان مسُر کہ چندی خوار تا اسُل درک متو کہ ہرانگ ئِ گُم مسُر۔ایلم نا مسڑ تو اوغسہ تینا لمہ نا بغل ٹی توس ولے ایلم سراج نا مار گوکلہ کرسہ مجلس ٹی تخوک باوہ نا دستار کِن مون کرے ۔سراج منہ کننگ اس تا بلا ایلم پارے ال تا چناسے ہمر کروئے تا۔واقعی اندن مس او گوازی گوازی اٹ دستار ئِ اندن تڑفے کہ پین کس خنوس تو یقین کتوکا کہ دا کنا باوہ نا دستار اس….
اللہ نافضل اٹ کوٹی نا ہم فیصلہ مَس۔ کل داسا بَش مسُر کہ نن نیمہ مرسہ اس ….سراج پارے ہلہ دادستار ئِ ہلارے۔ ایلم جان دوست مسخرہ ٹی پارے کہ ….ای تو ایہن دستار نا شوق تخپرہ ایلم دین جان ئِ ایتبوتا….ایلم دین جان ہم تینے کَر کرسا تینا مسڑ ئِ ہرفے او سرہلک۔داوڑ غٹ آک باوہ نا دستارئِ بے رضا خیر خلکُر ہنار….
آخر ای باوہ نا تڑوک آ دستار ئِ ہرفیٹ کاٹم آپیڑاٹ وسرہلکُٹ….

Related Articles

Leave a Reply

Your email address will not be published. Required fields are marked *

Close
Close